03-10-2011 SalNur

     Діни мәселелерді зерттеу және психологиялық реаблитациялау орталығы Астана қаласының Ішкі саясат басқармасының қаржы қолдауымен ашылған. Негізгі мақсаты - діни ахуалға мониторинг жасап отыру, аналитикалық және зерттеу жұмысы, кеңес беру және ақпараттық көмек көрсету, түрлі діни бірлестіктердің қызметіне байланысты сұрақтарда билік органдарына, қоғамдық ұйымдарға, БАҚ-қа әсер ету, азаматтардың, бірінші кезекте жастардың теріс пиғылды бірлестікке кіріп кетпеудің алдын алу. Әсіресе дәстүрлі емес діни ұйымдардан зардап шеккендерге кеңес беру және психологиялық реаблитациялау көмегін көрсетуді негізгі мақсатқа алып отыр. Баспасөз мәслихатында орталық басшылары экстремистік және террорлық ұйымдардың дінді тасалау қолданатынын, азаматтардың денсаулығына, психологиялық ахуалына зардап келіп жатқанын, тіпті кейбір діни бірлестіктің көшбасшылары азаматтардың мүлкін алып қойған жағдайларды, мұның соңы отбасының ыдырауына, өзін-өзі өлтіруге әкеп жатқанын алға тартып, осы шиеленіскен мәселелердің шешімін табуға атсалысатындарын айтты. Орталық әлеуметтанушылар, психолог және заңгер, дінтанушы мамандармен қамтамасыз етілген.
   Діни мәселелерді зерттеу және психологиялық реаблитациялау орталығының басшысы Руслан Қамаштың айтуынша, Астана қаласы тұрғындарының 65 %-ы ислам дінінде, 28%-ы проваслав дінінде, қалған 5 пайызы басқа сенімдегі тұрғын болып саналады. Сондай-ақ, қалада заңды түрде тіркелген 55 діни ұйым жұмыс жасайды. 1990 жылы небәрі 670 қана болған діни бірлестіктердің саны бүгінде 4,5 мыңнан асады. 
Заңсыз түрде жұмыс жасайтын діни бірлестіктен зардап шеккендерге 8 (7172) 50-24-98 желісі арқылы тегін психологиялық кеңес берілетін болады.